Ак илбирсти аткандар кармала элек

Жакында эле Таласта октон жаракат алган жана Жумгал районунда сарайлардын бирине малга кол салып, ошол жерде камалып калган ак илбирстин абалы канааттандырарлык. Бул боюнча тиешелүү органдар өткөргөн маалымат жыйында маалым болду. Учурда эки жаныбар тең кызматкерлердин жана ветеринарлардын тыкыр көзөмөлүндө.

Таласта жаракат алган абалда табылган ак илбирс Бишкекке алып келинди. Ага тиешелүү ветеринардык кароолор уюштурулуп, рентгенге тартылды. Рентгендин жыйынтыгы боюнча ак илбирстин башында октун калдыктары бар экендиги белгилүү болгон. Айлана-чөйрөнү коргоо агенттигинин маалыматы боюнча ак илбирстин абалы начар. Жакынкы убакта анын баш сөөгүндөгү октун калдыктары операция жолу менен алынат.