Бир күндө төрөлгөн эки залкар. Болот Шамшиев менен Рысбай Абдыкадыровдун 80 жылдыгы белгиленди!

Кыргыз киносунун мэтри Болот Шамшиев — «кыргыз кереметинин гана жаратуучусу эмес, дүйнөлук киноматогрофтордун суктануусуна арзыган легенда. Анын режиссерлугу алдында тартылган канча тасма болсо, ар бири өзүнчө тарых, өзүнчө жаңы ачылыш эле дешет — киночулар. Бүгүн бул залкар режиссердун көзү тирүү болгондо туура сексенге чыкмак. Бул белгилүү датага ылайык, Болот Шамшиевдин “Баатыр жүрөк Кааба-” деген кинороманынын бет ачар аземи болуп өттү. Бүгүн баш калаада дагы бир кыргыз маданиятынын залкары, ырчы, обончу Рысбай Абдыкадыровдун дагы 80 жылдык маарекеси өттү.

Кыргызстандагы Жогорку окуу жайларында контракттык негизде билим алып жаткан студенттер, 2020-2021-окуу жылына карата акы төлөөнүн көлөмүн элүү пайызга чейин кыскартууну талап кылышууда. Азыркы тапта, университеттердеги бир жылдык окуу акынын көлөмү 25 миң сомдон 3 миң долларга чейин барат. Учурда окуу процесси онлайн форматта жүргүзүлүүдө.

Кыргызстан өлкөдө өндүрүлгөн эт азыктарын Арап мамлекеттерине экспорттойт. Учурда бул боюнча сүйлөшүүлөр жүрүп жатканын айыл чарба министри Тилек Токтогазиев билдирди. Ал ошондой эле республиканын азык-түлүк коопсуздугун камсыздоо үчүн министрлик атайын багытта иштеп жатканын кошумчалады. Учурда дыйкандарды кооперация жана ассоциацияларга бириктирүү аракети көрүлүүдө. Анын алкагында сүт палатасы, мал чарбаларынын, бал өндүрүүчүлөрдүн жана балык өстүрүүчү чарбалардын ассоциациялары уюштурулууда.

Кыргызстанда коронавирустан жалпы 1 миң 374 жаран көз жумган. Бул тууралуу саламаттык сактоо министринин орун басары Нурболот Үсөнбаев брифингде билдирди. Бүгүнкү күнү стационарларда коронавирустан 808 бейтап, амбулатордук түрдө 1 миң 203 адам дарыланууда. Кыргызстанда пандемия башталгандан бери 82 миң 495 адам коронавирус жуктурган. Алардын ичинен 78 миң 181 киши айыгып чыккан.

Ош шаардык жарандык коргонуу штабынын чечими менен билим берүү мекемелеринин иштөөсунө уруксат берилди. Ага ылайык 11-январдан тарта бала бакчалар иштей баштады. Ал эми 14-январдан тарта калаадагы орто мектептер окуучуларды кабыл ала баштайт. Балдар бакчалар жана мектептер кандай тартипте иштейт?