Пирамида
С Вами на все времена!
УКМК мамлекеттик органдардагы коррупцияны аныктоо, алдын алуу жана бөгөт коюу боюнча жүргүзүлүп жаткан иштердин жүрүшүндө Алмамбет Салиев тарабынан мыйзамсыз баюу фактысы аныкталды.
Алмамбет Салиев мамлекеттик кызматта иштеген мезгилде сот системасынын ишине активдүү кийлигишкен жана ал өзүнүн мүлкүн аффилирленген жактарга каттаткан.
Салиев ушундай жол менен алынган ири өлчөмдөгү каражаттарды көп кабаттуу үйлөрдү жана башка соода объектилерин куруу үчүн курулуш компанияларынын бирине жумшаган.
Көрсөтүлгөн сотко чейинки өндүрүштүн алкагында Алмамбет Салиевдин бардык мүлктүк жана каржылык активдерин аныктоо боюнча тиешелүү ыкчам тергөө иш-чаралар жүргүзүлүүдө.
Иште чогултулган далилдердин негизинде 16-июнда Кылмыш-жаза кодексинин 323-беренесинин 3-бөлүмү “Мыйзамсыз баюу” фактысы боюнча Алмамбет Салиев кармалып, УКМКнын тергөө абагынын убактылуу кармоочу жайына киргизилди.
Садыр Жапаров Ысык-Көл облусундагы “Кумтөр” кенинин иши менен таанышуу учурунда «Кумтөр Голд Компани» жабык акционердик коомунун эмгек жамааты менен баарлашты.
Мамлекет башчысы ишкана иштеп жатканын жана мындан ары да планга ылайык, туруктуу негизде иштей тургандыгын өзгөчө белгилеп,
мындан улам компаниянын эмгек жамаатын өлкө элинин кызыкчылыгына чын дилден жана абийирдүүлүк менен иштөөгө үндөдү.
Садыр Жапаров алтын кендин ата мекендик экономикадагы өзгөчө ордуна токтолуп,
убактылуу тышкы башкарууну киргизүү менен “Кумтөр” кенинде мындан ары экология менен айлана-чөйрөнү коргоо маселелерине чоң көңүл бурула тургандыгын баса белгиледи.
Ошондой эле ал «Кумтөр Голд Компани» ЖАКынын эсебинен Нарын облусун өнүктүрүү фондун түзүү чечими кабыл алынгандыгын билдирди.
Жолугушуу суроо-жооп форматында уланды.
Компаниянын кызматкерлерин учурдагы иши, ден соолуктарын чыңдоо жана социалдык мүнөздөгү башка уюштуруу чаралары боюнча суроолор кызыктырды.
Мамлекет башчысы көтөрүлгөн бардык суроолорго жооп берип, өз кезегинде «Кумтөр Голд Компани» ишканасынын кызматкерлерине ийгиликтерди каалады.
Садыр Жапаров кен эми толугу менен Кыргызстандын кызыкчылыгына иштеп баштагандыгы үчүн
компаниянын бардык кызматкерлерин ишкананын мүлкүнө аяр мамиле жасоого жана болгон күч-аракетин жумшап иштөөгө чакырды.
Президент Садыр Жапаров “Кумтөр” алтын кениндеги убактылуу тышкы башкаруу киргизилгенден кийинки абал менен таанышты.
Мамлекет башчысына алтын кендин үзгүлтүксүз, штаттык режимде иштеп жаткандыгы билдирилди.
“Кумтөр Голд Компани” жабык акционердик коомунун кызматкерлери тышкы башкаруунун киргизилишин түшүнүү менен кабыл алышкан.
Айлык маяналар өз убагында жана толук көлөмдө төлөнүп, өлкөнүн бюджетине түшүүчү бардык төлөмдөр жана салыктар планга ылайык жүргүзүлүп жаткандыгы тууралуу маалымат берилди.
Президент алтын ылгоочу фабриканы көрүп чыкты.
Анда бир айга жетпеген убакытта убактылуу тышкы башкаруу мезгилинде “Кумтөр Голд Компани” 44 миң унций алтын сатып,
анын натыйжасында 40 миллион АКШ доллары өлчөмүндө дүң киреше түшкөнү белгиленди.
Ишкананын кызматкерлеринин белгилешинче, кен мол чыккан жерди казуу иштери башталса алтындын көлөмү көбөйөт.
Ошондой эле Садыр Жапаров карьерге да барып, тоо-кен иштерин жүргүзүүдө коопсуздук талаптарын сактоонун зарылдыгына токтолду.
Бишкектин мурдагы вице-мэри А.У.Ш. мыйзамсыз баюу фактысы боюнча кылмыш иши козголду.
Бул тууралуу Улуттук коопсуздук боюнча мамлекеттик комитети билдирет.
Уланбек Азыгалиев жана мэриянын айрым структуралык бөлүмдөрү кызмат абалдарынан пайдаланып,
өзүнө караштуу чарбалык субъектилердин өкүлдөрүнө көп кабаттуу үйлөрдү курууга уруксат беришкендиги аныкталды.
Мыйзамсыз аракеттердин натыйжасында А.У.Ш. жакын туугандарына, Бишкек шаарында жана Ысык-Көл облусунда 7 жер тилкеси,
11 кызматтык жайлар жана 4 турак жай, 11 батир жана 10 унаа токтотуучу жай,
Ысык-Көл облусунда 2 коттедж жана 5 кымбат баалуу унааларды өзүнө тиешелүү адамдарга каттаткан.
Натыйжада А.У.Ш. жакын туугандарынын кирешелери кескин көбөйгөн. Анын байлыгы 100 миллион сомдон ашык каражатка бааланган.
Учурда кылмыш иши боюнча мыйзамсыз алынган мүлктөрдүн бардык тизмесин аныктоого багытталган ыкчам тергөө иш-чараларынын комплекси жүргүзүлүп жатат.
Нью-Йорктогу кыргызстандыктар “Кумтөр” алтын кенин иштеткен канадалык Centerra Gold компаниясына каршы митинг уюштурушту.
Митингчилер компаниянын өлкөнүн экологиясына келтирген зыянына нааразычылыгын билдиришти.
Анда мөңгүлөрдү талкалаганы жана экологияга зыян келтиргени үчүн канадалык компанияны жоопкерчиликке тартууну талап кылышкан.
Эске салсак, 17-майда Жогорку Кеңештин кезексиз жыйынында депутаттар “Кумтөр” алтын кенинин ишмердүүлүгүн иликтеген мамлекеттик комиссиянын отчетун карашкан.
Анда министрлер кабинетине «Centerra Gold Inc.» компаниясынын жоопкерчиликсиз аракеттерине байланыштуу «Кумтөр Голд Компаниге» убактылуу тыштан башкаруу киргизүүнү сунуштаган.
Жыйындын жүрүшүндө Камчыбек Ташиев УКМКнын Башкы тергөө башкармалыгында “Кумтөргө” байланыштуу 4 кылмыш иши турганын билдирген.
Ошондой эле ал “Кумтөрдөн” сыйлык алып турган депутаттар дагы бар экенин айткан.
Кийин Улукбек Марипов “Убактылуу тыштан башкарууну дайындоонун тартибин бекитүү жөнүндө” токтомго кол койгон.
«Кумтор Голд Компани» компаниясынын убактылуу тыштан башкаруучусу болуп Тенгиз Бөлтүрүк дайындалган.
Бүгункү күндө Кумтөр иши боюнча бир катар аткаминерлер жана мурдагы депутаттар кармалган.
Францияда карантин чаралары күчөтүлгөнү менен кафе-ресторан жана спорттук залдардын иштөөсүнө уруксат берилди. Мындай көрүнүш Ирландияда дагы орун алды. Бул учурда Испанияда COVIDге байланыштуу санитардык талондор бериле баштады. Анын жардамы менен адамдар коронавирус тууралуу бардык маалыматты жанында алып жүрө алышат. Ал эми Европанын көпчүлүк өлкөлөрүндө жаш балдарды эмдөө башталды.
Садыр Жапаровдун президент катары Түркияга болгон алгачкы расмий иш сапары аяктады. Түркиянын лидери менен жолугушууда мамлекет башчысы Кыргызстан кыргыз-түрк кызматташтыгын өнүктүрүүгө багытталган жаңы кадамдарга даяр экендигин баса белгиледи. Мындан тышкары, мамлекет башчылары бир катар документтерге кол коюшту.
Жакын арада Түркиянын Анталия шаарында Кыргызстандын башкы консулдугу ачылат. Мындан ары да мекендештер көп жашаган райондордо дипломатиялык жана консулдук өкүлчүлүктөрдү кеңейтүү боюнча иштер улантылмакчы. Бул туурасында Президент Садыр Жапаров Түркияга болгон расмий сапарынын алкагында мекендештер менен жолукканда билдирди. Мамлекет башчысы Түркияда иштеп, билим алып жүргөн кыргызстандыктар менен ачык-айкын сүйлөшүп, алардын суроолоруна да жооп бергенге жетишти. Ошондой эле Президент Мамлекеттик миграция кызматынын тышкы миграция чөйрөсүндөгү функциялары Кыргызстандын Тышкы иштер министрлигине өткөрүлүп берилгенин, бул эмгек мигранттарынын бир катар маселелерин ыкчам чечүүгө жардам берерин айтты.