Кыргыз балбандарынын жаңы жылдык белеги!

Өтүп бараткан жылдын соңунда Кыргызстандын күрөш боюнча курама командасы жалпы мекендештерге жаңы жылдык мыкты белек тартуу кылышты. Күрөш боюнча Дүйнө Кубогуна барган Кыргызстандык балбандар 3 алтын жана 5 коло медалды багындырышкан. Жалпы медалдык эсеп боюнча улуттук курама команда экинчи орунга татыган. Сербия мамлекетинин Белград шаарында өткөн Дүйнө кубогунда байгелүү орундарды ээлеген спортчуларга президенттин милдетин аткаруучу Талант Мамытов акчалай сыйлыктарды тапшырды. Учурда жалпы кыргызстандыктар 2021-жылы Японияда өтө турчу Олимпиада оюндарында биздин спортчулар жеңүүчү болуп кайтып келээрине үмүт артышууда.

1 миң 355. Бул короновирус ооруусунан курман болгон кыргызстандыктардын саны. Дүйнөнү каптаган вирустан улам узап бараткан жылда мекендештерибиз өлкөнүн өнүгүүсүнө салымын кошуп келген чыгаан инсандарды, өз кесиптеринин мыктыларын акыркы сапарга узатты. Алардын артында мамлекетке өтөгөн эмгеги менен бирге ишке ашырууга үлгүрбөй калган кыялдары калды.

Коронавируска каршы күрөшүү максатында Кыргыз өкмөтү эл аралык финансылык институттардан 774 млн доллар жардам алат. Каражаттын 173 млн доллары грант түрүндө болсо, 597 млн доллар кредит. Бул Кыргызстандын мамлекеттик карызы 4 млрд. 800 млн. доллардан ашты дегендик. Кыргызстандын экономикасы эгемендик алгандан тарта эле чет элдик жардамдардан жана чет жерде иштеген миллиондон ашык эмгек мигранттарынын акча которууларына көзкаранды. Кыргыз жергесине акыркы сегиз айдагы акча которуулар 107 млн долларга кыскарып 1 млрд. 462 млн долларды түздү. Ал эле эмес өлкө бюджетинин быйылкы дефицити пандемиянын айынан 35 млрд сомду түзгөнүн финансы министрлиги эскертти. Өкмөт болсо мамлекет жарандардын алдындагы социалдык милдеттемелерин толук аткара турганын айтууда.

12 ай бою Пирамиданын маалымат кызматы өлкөдө болуп жаткан жаңылыктар менен сиздедри тааныштырып келди. Бул жылда мамлекеттин жана жарандын жашоосу көптөгөн сыноолор менен коштолду. Алардын эң негизгиси Пандемия. Кыргызстан эле эмес дүйнөнүн ар бир жашоочусу узап бара жаткан жылды ушул сөз менен эстеп калаары талашсыз. Күтпөгөн жерден пайда болуп, дүйнө окумуштууларын ойго салган ооруу менен күрөшүү жеңил болгон жок. (1)Пандемияга каршы аракеттенүүдө кыргызстандагы жарандык коом жана ыктыярчылар дүйнө элине биримдик жана ынтымактын үлгүсүн көрсөтө алды. Ал эми ак халатчандар жалпы элдин алкоосуна татыды.

Пандемия маданият тармагына да өзгөртүүлөрдү киргизди. Коронавирус көптөгөн маданий жана майрамдык иш-чараларды экинчи планга жылдырууга себеп болду. Ага карабай мамлекет бир нече маанилүү майрамдарды жаңы форматта белгиледи.

Кыргызстандыктарга алгачкы жолу башкаруу формасын тандоо мүмкүнчүлүгү берилүүдө. Бул тууралуу аталган маселени талкуулаган конференциянын катышуучулары билдиришти. Алардын пикиринде буга чейин мамлекеттин жетекчилигине келгендер эл менен эсептешпей өлкөнү каалагандай башкарып келген. Мындан улам жарандар арасында алдыда өтө турган референдум тууралуу кеңири маалымат берүү кажет — деп эсептешет иш-чаранын катышуучулары.

Эскилиги жетип, авариялык абалдагы ооруканада иштеген кооптуу күндөр артта калды. Ош облусунун Чайчи айылында эмгектенген үй-бүлөлүк дарыгерлер тобу курулушу аяктаган оорукананын жаңы имаратына көчүрүлдү. Ал 15 орунга ылайыкталып, бардык шарттар жана заманбап медициналык жабдуулар менен камсыздалган.

Кыргызстанда 1-январга чейин Ички иштер министрлигинин өздүк курамы күчөтүлгөн режимде кызмат өтөйт. Бул тууралуу ИИМдин маалымат кызматы кабарлады. Жаңы жыл майрамын өткөрүүдө коомдук тартипти жана жарандардын коопсуздугун камсыздоо максатында бүгүн борбор калаада милициянын гарнизондук саптык кароосу болуп өттү. Министр Улан Ниязбеков президенттик шайлоодо жана үгүт маалында да ички иштер органдарынын кызматкерлеринен коопсуздукту жогорку деңгээлде камсыздоону талап кылды.

Токмок шаарындагы кездемелерди чыгарган ири “Текстиль Транс” ишканасынын аймагында жип өндүрүүчү жаңы фабрика ишке кирди. Анда жаңы 80 жумушчу орун түзүлдү. Эми аталган компанияда бир суткада 5 тоннадан ашуун жип өндүрүлүп турмакчы. Бүгүн фабриканын кошумча имаратынын ачылуу аземи өттү.

Бишкек шаардык мэриясынын жылдык ишине мэрдин милдетин аткаруучу Балбак Түлөбаев “5” деген баа берет. Ал бүгүн журналисттердин суроолоруна жооп берип жатып, Бишкекти жаңы жылга карата кооздоо үчүн каражат коротулбаганын эске салды. 2020-жылды борбор калаа кандай жыйынтыктап жатат, келерки жылга койгон максаттары кайсылар?

Өтүп бара жаткан жыл оор болгонуна карабастан, ата мекендик спортчулар өз күйөрмандарын жеңиш жана байгелүү орундар менен кубандырышты. Алардын арасында Айсулуу Тыныбекова дагы бар. Тыныбекова жакында эле Сербияда өткөн аялдар арасындагы Дүйнө Кубогунда дагы бир жолу алтын медалды жеңип алды. Бүгүн, Кожомкул атындагы Спорт Ордосунун жаштар борборунда дал ушул спортчуларга жана спорт тармагында жакшы натыйжаларды көрсөтүп жаткан машыктыруучуларына сыйлык тапшыруу аземи болуп өттү.

Өлкөнүн дээрлик 70% жараны президенттик башкаруу формасын колдойт. Мындай болжолдуу көрсөткүчтөр “Саясат.kg” маалымат-аналитикалык порталы жүргүзгөн телефондук сурамжылоодо белгилүү болду. Анда кыргызстандыктардын арасында мамлекеттин кайсы башкаруу түрүн колдой тургандыгын айтышкан.

Алдыда өтө турчу тандоодон, мамлекеттик башкаруу формасын аныктоо менен коомчулук Кыргызстандын келечек тагдырын чечет. Андыктан ар бир жаран тандоого коюлган президенттик башкаруу формасы менен катар парламенттик башкаруунун артыкчылыктарын жана кемчиликтерин айырмалай билүүсү керек дешет талдоочулар. 10-январь же референдум өлкөнүн келечеги үчүн эмнеси менен маанилүү?

Үстүбүздөгү жылдын 11 айында туризм, курулуш, өндүрүш сыяктуу ишканалар эбегейсиз чыгымдарга кабылып, киреше бөлүгү 20 эсеге чейин азайган. Буга пандемиянын биринчи жана экинчи толкуну, октябрь айындагы окуялар себеп болгон. Бир гана айыл чарба тармагынын көрсөткүчтөрү өскөнү байкалган. Өлкө аймагында быйылкы жылы 60тан ашуун айыл-чарба продуктыларын кайра иштетүүчү жаңы ишканалар пайда болуп миңге жакын жумушчу орундар түзүлдү.

Жыл сайын жаңы жылдын алдында Бишкекте республиканын бардык аймактарынан келген мектеп окуучуларынын катышуусунда президенттик балаты уюштурулуп келген. Бул жылы өлкөдөгү эпидемиологиялык кырдаалды эске алуу менен балдарга арналган жаңы жылдык иш-чара онлайн-форматта өтүп, мамлекет башчынын белектери аймактарда тапшырылууда.