Пирамида
С Вами на все времена!
Өлкөдөгү кырдаалды ар кандай жолдор менен туруксуздаштырууга аракет кылгандарга мыйзамга ылайык катуу чаралар көрүлөт! Ички иштер министрлиги өлкөнү туруксуздаштыруу максатында чагымчыл жана башка материалдарды тараткандар да жоопкерчиликке тартыларын эскертет. Тартип сакчылары мыйзамсыз аракеттер бир гана мамлекет жана коомго зыян алып келбестен, республиканын башка жарандарына дагы коркунуч жаратарын белгилешет. Мындан улам ички иштер министрлиги чагымчыл материалдарды тараткандарды тактоо боюнча иштерди жүргүзүүдө.
Чүй облусундагы эскилиги жеткен саламаттыкты сактоо мекемелеринин имараттары оңдоп-түзөөдөн өткөрүлө баштайт. Тармактын ич жылытарлык эмес абалы пандемия учурунда өзгөчө байкалган. Вице-премьер-министр Эльвира Сурабалдиева Чүй облусундагы бир катар саламаттыкты сактоо, билим берүү мекемелеринин имараттарынын абалы менен таанышты. Ошону менен аткаминер мекемелердеги негизги делген көйгөйлөрдү жеринен көрүп чыкты.
Ал арада вице-премьер-министр Эльвира Сурабалдиева Чүй облусундагы билим берүү тармагынын кызматкерлери менен жолугушуп, билим берүү мекемелеринин имараттарынын абалы менен дагы таанышып чыкты.
Кыргызстан Иран менен ЕАЭБ өлкөлөрүнүн ортосундагы соода жүгүртүүнүн көлөмү боюнча төртүнчү орунда турат. Бул тууралуу журналисттер менен болуп өткөн маалымат жыйында Иран Ислам Республикасынын Элчиси Саид Харази билдирди. Анын айтымында, эки өлкө тең бул жаатта кызматташууну арттырууга кызыкдар. Эркин соода-өнөр жай тармагы жөнүндө келишим түзүлгөндөн кийин, чакан ГЭСтерди куруу жана ар кандай продукцияларды экспорттоо боюнча алгылыктуу иштер аткарылары маалым болду.
Шайлоочулардын акыркы тизмесине биометрикалык каттоодон өткөн 3 млн 563 миң 574 жаран катталды. Эки саясий өнөктүктү утурлай, паспорт алууга арыз тапшыргандарга кызмат көрсөтүү үчүн Мамлекеттик каттоо кызматынын калкты тейлөө борборлору 7-январдан баштап 4 күн катары менен иштейт. Ошол эле маалда 119 Call-борборунун операторлору күчөтүлгөн режимде иштөөгө өттү. 10-январда, алтымыштан ашык адис телефон чалууларга жооп берет. Кыска номерге чалуулар бардык уюлдук операторлордун абоненттери үчүн акысыз. Мындан тышкары, жарандарды биометрикалык идентификациядан өткөрүү үчүн жабдыктарды даярдоо иши жүрүп жатат. Алдыдагы шайлоодо өлкө боюнча «Инфоком» ишканасынын 420 кызматкери жана шайлоочуларды идентификациядан өткөрүү үчүн 6200 комплект жабдык иштейт. Кошумча резервдик жабдыктар дагы камдалууда.
Коопсуздук демекчи, Ош шаарында элдин баарынын көңүлүн бурган кичинекей милиция бар. 8 жаштагы Бейшенбек Эсеев өзүн милициянын образында алып жүрөт. Ал чоңойгондо мекенди коргогон тартип сакчысы болом дейт. Азырынча кыялы орундала элек болсо да, келечекте сөзсүз максатыма жетем дейт Бейшенбек.
Административдик ресурстарды кыянаттык менен пайдалануу, шайлоочулардын добушун сатып алуу жана шайлоочуларга кысым көрсөтүү, коркутуу жөнүндө элүүдөн ашык билдирүү катталды. Бул “Жалпы иш” фондунун байкоочулары тарабынан аныкталган мыйзам бузуу боюнча маалыматтар. Фонддун өкүлдөрү маалымат жыйында үгүт өнөктүгүнө байланыштуу ачык-айкындуулукту камсыз кылуу максатында жүргүзгөн байкоо иштери менен тааныштырышты.
Шайлоочулардын тизмесинен аты-жөнүн тактоо, катталган жерин аныктоо. Ушул жана башка кызыктырган суроолорго БШКнын call-борборунун операторуна 12-55 кыска номерине чалып, жооп алсаңыздар болот. Атайын ачылган борбордун иши менен биздин чыгармачыл топ дагы таанышып кайтты.
Шайлоо күнү санитардык-эпидемиологиялык коопсуздукту камсыздоого жана жарандардын ден соолугун COVID-19дан коргоого өзгөчө көңүл бурулат. Саламаттык сактоо министри Алымкадыр Бейшеналиев билдиргендей, шайлоо комиссияларынын мүчөлөрү кол кап, беткап жана калкандар менен камсыздалмакчы. Саясий өнөктүктү уюштуруу маселелери боюнча алгоритмде белгиленген тартипке тыкыр көзөмөл жүргүзүлөрү айтылды. Адистер жарандарды да кеп-кеңештерин так сактоону эскертишет.
Ошко алыскы чет өлкөдө эмгектенген кыргызстандыктар алты тез жардам унаасын белек кылды. Пандемия шартында тез жардам унаасынын жетишсиздигинен улам бул тармакта кыйынчылыктар жаралган болчу. Буга байланыштуу мигранттардан турган демилгелүү топ медицина тармагына өз салымын кошууну чечкен.