БИЗДИН МАКСАТ — ЖАҢЫ КЫРГЫЗСТАНДЫ КУРУУ

“Ала-Арча” мамлекеттик резиденциясында талыкпаган ишиндеги ири жетишкендиктери үчүн бир катар кыргызстандыктар мамлекеттик сыйлыктар менен сыйланды. Баш-аягы 230дай кесип ээсине сыйлыктарды Президент Садыр Жапаров тапшырды. Арасында жазуучу, мугалим, аскер, жолчу, айдоочу жана башка күжүрмөн эмгеги менен өзгөчөлөнгөн адистер бар. Кыргызстандын социалдык-экономикалык, интеллектуалдык жана маданий потенциалын өнүктүрүүгө зор салым кошкон бул жарандар мамлекеттин тынчтыгы, эл биримдиги маанилүү экендиктерин белгилешет. Анткени бир жакадан баш, бир жеңден кол чыгарганда гана Эгемендүү Кыргызстан мындан ары өнүгүүгө бет алат.