Электр кубаты үчүн сунушталган жаңы тарифтер сентябрь айына чейин күчүнө кирбейт

Электр кубаты үчүн сунушталып жаткан тарифтер сентябрь айына чейин күчүнө кирбейт. Ага чейин ар бир кыргызстандык талкууга чыгарылган жаңы тарифтер боюнча сунуш-пикирлерин бере алат. Энергетика жана өнөр жай министри Кубанычбек Турдубаев август айына дейре калктан түшкөн билдирүүлөр эске алынарын айтты. Мындан кийин гана долбоор даярдалып, өкмөткө жөнөтүлмөкчү. Эске салсак, кечээ Президент Садыр Жапаров энергетика тармагынын ардагерлери жана адистери менен болгон жолугушууда энергетикадагы кризистен чыгуу үчүн электр энергиясына болгон тарифтерди өзгөртүүнү сунуштаган.