Ишкерлерди колдоо иштери улантылууда

Региондорду өнүктүрүү жылында акчанын агымы аймактарга бурулуп, ишин жаңыдан баштап же өндүрүшүн кеңейтүүнү каалагандарга жакшы колдоолор көрсөтүлүп келет. Алсак, Ош облусунун Өзгөн районунда 10 гектар жерине алманын түрүн тиккен Кубанычбек Асылбековдун ишине Россия-Кыргыз өнүктүрүү фонду көмөк көрсөтүп, ал эми логистикалык борбор куруу үчүн жер тилкесин жергиликтүү бийлик караштырып жатат. Облус башчысы Узарбек Жылкыбаев Өзгөнгө барып, багбандын иши менен таанышып, таза суу, ирригация тармагында да жүрүп жаткан иштерге күбө болуп кайтты.