Өкмөт инвестициялык долбоорлорду ишке ашырууда элдин, мамлекеттин кызыкчылыгын жогору коёт

Акыркы убактарда социалдык тармактарда “Ат-Башыга курула турчу логистикалык борбордун жери кытай тарапка 49 жылга берилиптир”, “ага кеткен каражат карызга алыныптыр” сыңдуу маалыматтар желдей тарап, коомчулукта түшүнбөстүктөрдү, нааразычылыктарды жараткан. Бул максатта вице-премьер-министр Замирбек Аскаров баштаган тармактык мамлекеттик органдардын жетекчилери Ат-Башыга барып, жергиликтүү бийлик өкүлдөрү менен бирге индустриалдык-соода-логистикалык борборун куруу боюнча жергиликтүү элдин суроолоруна жооп беришти. Өкмөт инвестициялык долбоорлорду ишке ашырууда элдин, мамлекеттин кызыкчылыгын жогору коёт деген вице-премьер-министр ага кеткен каражат эч кандай насыяга алынбаганын айтып, мамлекеттик чек аранын кыргыз-кытай тилкесиндеги бажы бекети бир метр ары да, бери да жылбай турганын баса белгиледи. Жолугушуу суроо-жооп форматында өтүп, жергиликтүүлөр кызыктырган суроолорун берип, жооп ала алышты.