«Орто-Сайдагы» өрттөн 8 дүкөн, 2 кабаттуу тигүүчү цех жана кампалар күйүп кетти

8 дүкөн, эки кабаттуу тигүүчү цех жана кампалар. Жалпы эки миң чарчы метрге чукул жер баш калаадагы «Орто-Сай» базарында чыккан тилсиз жоодон күйгөн. Пандемиядан кийинки кризистен эми-эми өзүнө келе баштаган соодагерлердин өрт кырсыгынан тарткан запкасы он миңдеген долларды чамалайт. Дүйшөмбүгө караган түнү «Орто-Сай» базарында чыккан өрт эртең менен саат 8:55те толугу менен өчүрүлдү. Бактыга жараша, кырсыктан жабыркагандар менен каза болгондор жок.