Кыргыз-казак мамлекеттик чек арасында логистикалык борбор ачылат

Президент Садыр Жапаров Казакстанда 2 күндүк мамлекеттик сапары менен жүрөт. Анда мамлекет башчылары эки тараптуу сүйлөшүүлөрдү жүргүзүп, кызматташуунун актуалдуу маселелерин, өз ара алакалардын келечегин талкуулашты. Ошондой эле чек ара кызматташтыгынын потенциалын ачуу максатында кыргыз-казак Биринчи региондор аралык форумун өткөрүүнүн маанилүүлүгү айтылды. Товарлардын тоскоолдуксуз өтүүсүн камсыздоо үчүн кыргыз-казак мамлекеттик чек арасында логистикалык борборду түзүүнү тездетүү тапшырмасы берилди. Нур-Султан шаарында Манастын жана Чыңгыз Айтматовдун эстеликтери, ал эми Бишкек шаарында Абай Кунанбаевдин эстелиги орнотулмакчы. Мамлекеттик сапардын алкагында Жапаровдун Казак Мажилисинин Төрагасы Нурлан Нигматулин жана Премьер-министр Аскар Мамин менен жолугушуусу пландалган. Ошол эле учурда, Казакстандын ишкерлер чөйрөсүнүн өкүлдөрү менен жолугушуусу мерчемделген.